فیض احمد فیض کے نام سے منسوب سہ روزہ چھٹا فیسٹیول آج شروع ہو گا

صوبائی دارالحکومت لاہور میں عالمی شہرہ آفاق شاعر ، ادیب ، سکالر فیض احمد فیض کے نام سے منسوب سہ روزہ چھٹا فیسٹیول آج شروع ہو گا ۔ یہ فیسٹیول فیض گھر ، سٹی آف لٹریچر ، لاہور آرٹس کونسل الحمراءو دیگر ادب پرور اداروں کی پیشکش ہے جس میں 50 کے قریب نشستوں میں با معنی مکالموں کے ذریعے زبان و ادب اور اس سے ملحقہ دور حاضر کے ہر موضوع پر گفتگو ہو گی ۔

فیسٹیول کا آغاز فیض احمد فیض کی نادر و نایاب تصاویر پر مبنی نمائش سے آج شام 5 بجے الحمراءآرٹ گیلری میں ہوگا۔افتتاحی تقریب میں معروف آرٹسٹ سلیمہ ہاشمی، چیئر پرسن الحمراءمنیزہ ہاشمی ،کمشنر لاہور کیپٹن (ر)محمد عثمان ،ایگزیکٹو ڈائریکٹر الحمراءذوالفقار علی زلفی اور دیگر اہم ادبی و ثقافتی شخصیات بھی شرکت کریں گی۔سہ روزہ چھٹا فیض فیسٹیول 4تا 6مارچ جاری رہے گا۔