مجرموں کو کسی صورت چھوڑنا نہیں ہے، عمران خان پر حملے میں جاں بحق شخص کے بھائی کا مطالبہ

وزیر آباد (این این آئی)گزشتہ روز وزیر آباد میں چیئرمین تحریک انصاف عمران خان پر ہونے والے قاتلانہ حملے میں جاں بحق شخص کے بھائی نے حکومت پنجاب اور عمران خان سے مطالبہ کیا ہے کہ مجرموں کو کسی صورت چھوڑنا نہیں ہے۔تفصیلات کے مطابق

عمران خان پر قاتلانہ حملے کے دوران جہاں چیئرمین پی ٹی آئی اور فیصل جاوید سمیت 13 افراد زخمی ہوئے وہیں معظم نامی شخص جاں بحق بھی ہوا جو اپنے بچوں کے ساتھ لانگ مارچ میں شریک تھا۔فائرنگ کے واقعے میں جاں بحق ہونے والے شخص معظم کے بھائی نے میڈیا سے گفتگو کرتے ہوئے کہاکہ بھائی نے مجھے کہا کہ تم اکیلے جا رہے ہو، میں تواپنے بچوں کو بھی لیکر جا رہا ہوں، ہمیں فخر ہے کہ ہمارے بھائی نے بہادری کا مظاہرہ کرتے ہوئے اپنی جان دی۔انہوںنے کہاکہ واقعہ کی فوٹیج سامنے ہے جس میں دیکھا جا سکتا ہے کہ جب میرا بھائی نیچے گرا تو سب لوگ بھاگ گئے، بس اس کے بچے اس کے پاس موجود تھے۔معظم کے بھائی نے کہاکہ ہمارا حکومت سے اور عمران خان سے بھی یہی مطالبہ ہے کہ یہ جو شہادت ہوئی ہے اس کا خون کبھی رائیگاں نہ جانے دیا جائے، امید ہے کہ ہمارے بھائی کا خون رائیگاں نہیں جائے گا۔