پاکستان

سارا پاکستان یوتھیا نہیں ہے، مریم نواز

چشتیاں(این این آئی)پاکستان مسلم لیگ ن کی نائب صدر مریم نواز نے کہا ہے کہ عمران خان حکومت میں ہو تو تباہی ، باہر ہوتو بھی تباہی، یہ ملک دشمن فارن ایجنٹ ہے، یاد رکھو، سیاسی میدان میں تمہیں مریم نواز نہیں بخشے گی، عمران خان کہتا ہے تقرر میرٹ پر ہونا چاہیے کیا تمہارا تقرر میرٹ پر ہوا تھا؟،کسی ادارے کے ساتھ لاکھ اختلاف ہو سکتے ہیں ،شہدا کی توہین برداشت نہیں کرسکتے،

ملکی معیشت بہتری کی طرف جا رہی ہے، بہت جلد معیشت کو دوبارہ ٹریک پر ڈال دیں گے۔انتخابی جلسے سے خطاب کرتے ہوئے انہوں نے کہا کہ انہوںنے کہاکہ نوازشریف کے شیرو !آپ کیلئے پارٹی قائد نے خصوصی سلام بھیجا ہے، محمد نوازشریف سے والہانہ محبت پر چشتیاں کے عوام کے مشکورہیں،چشتیاں والوں نے جومحبت اور شفقت دی اسے کبھی نہیں بھلاسکتی۔مجھے پتا ہے مہنگائی بڑھی ہے،پٹرول، ڈیزل کی قیمتیں بڑھی تو کہہ دیا تسلیم نہیں کرتی،میں نے قیمتیں بڑھنے پر حکومت سے ناراضگی کا اظہار کیا تھا۔انہوںنے کہاکہ شہباز شریف دن رات ان کی لگائی آگ کو بجھانے کی کوشش کررہا ہے،شوکت ترین اپنے وزرائے خزانہ کو کہتا ہے آئی ایم ایف کو خط لکھو، پاکستان دشمنی اس کونہیں کہتے تو پھر کس کو کہتے ہیں،آئی ایم ایف پیسہ شہبازشریف نہیں پاکستان کو دے رہا تھا۔لیگی نائب صدر نے کہا کہ آج مجھے پتا چلا ہے اس پرفرد جرم عائد ہوئی ہے،نوازشریف کو ایک اقامہ رکھنے پر دفتر سے اٹھا کر باہر پھینک دیا گیا،سیاست دان نہیں بلکہ بدمعاشوں کا گروہ ہے۔ شہباز شریف روزانہ سیلاب متاثرین کے درمیان ہوتا ہے، یہ دودفعہ دکھاوے کے لیے سرکاری ہیلی کاپٹر پر سیلاب متاثرین کے پاس گیا۔ مریم نواز نے کہا کہ گزشتہ روز اس نے کہا ن لیگ کو ووٹ دینا گناہ کے برابر ہے، مسلم لیگ پاکستان کو بنانے، سجانے والی جماعت ہے،فارن فنڈنگ لینے والے کو ووٹ دے کر کیا ثواب کی بات ہے۔ انہوںنے کہاکہ آج کل آرمی چیف کی تقرری کی اس کوبڑی تکلیف ہے،کہتا ہے تقرر میرٹ پر ہونا چاہیے کیا تمہارا تقررمیرٹ پرہوا تھا؟تمہارا تقرر کرنے کے لیے آر ٹی ایس کو بٹھانا پڑا تھا

،تمہارا تقرر کرنے کے لیے نوازشریف کو نااہل کرنا پڑا۔ انہوںنے کہاکہ اب یہ خاتون جج کودھمکیاں دیتا ہے۔ انہوںنے کہاکہ پاکستان میں یہ رواج نہیں ڈالنا چاہیے گالی دو اور فیصلہ لو، کیا نوازشریف، مریم نواز گالی نہیں دے گی تو ہمیں انصاف نہیں ملے گا؟ مجھے افسوس ہے اداروں کی توہین کر رہا ہے، کسی ادارے کے ساتھ لاکھ اختلاف ہو سکتے ہیں لیکن شہدا کی توہین برداشت نہیں کرسکتے،

ہیلی کاپٹر حادثے میں افواج پاکستان کے افسر شہید ہوئے، کہتا ہے افواج پاکستان پر تنقید ایسے کرتا ہوں جیسے کوئی باپ کرتا ہو، کبھی ان کوباپ اور کبھی ان کو اولاد بنا لیتا ہے۔مریم نواز نے کہا کہ یہ کیساباپ ہے جو ان کو کہتا ہے میرے لیے سیاسی میدان خالی کرا، جن کا باپ بن رہا ہے کبھی ان کو میر جعفر، میر صادق کہتا ہے، ان کو کہتی ہوں سارا پاکستان یوتھیے نہیں، کیا سارے پاکستان کو یوتھیا سمجھا ہے۔

انہوںنے کہاکہ ملکی معیشت بہتری کی طرف جا رہی ہے، بہت جلد معیشت کو دوبارہ ٹریک پر ڈال دیں گے۔ انہوںنے کہاکہ تباہی خان کی دوبارہ اقتدار میں آنے کی خواہش منوں مٹی تلے دب کر رہے گی، الیکشن آج ہو یا ایک ماہ بعد چشتیاں صرف شیر کا ہے، چشتیاں صرف نوازشریف کا ہے،

نوازشریف آئے گا ان کو لگ پتا جائے گا، اسی لیے نہیں آنے دیتے، نوازشریف جلدی اپنی دھرتی پرواپس آئے گا۔ انہوںنے کہاکہ تین بار کے منتخب وزیراعظم نوازشریف کو ایک بار بھی مدت پوری نہیں کرنے دی گئی،ملک بھر میں جتنے بھی بڑے ترقیاتی منصوبے ہیں سب پر نوازشریف کی تختی لگی ہے۔

Related Articles

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button