پاکستان

رانا ثناء اللہ نے نواز شریف اور اسحاق ڈار کے پاسپورٹ سے متعلق اہم اعلان کر دیا

فیصل آباد (مانیٹرنگ، این این آئی) وزیر داخلہ رانا ثناء اللہ نے میڈیا سے بات چیت کرتے ہوئے کہا کہ پاسپورٹ نواز شریف اور اسحاق ڈار کا حق ہے ان کے پاسپورٹ پی ٹی آئی حکومت نے غلط طور پر روکے ہوئے تھے، انہوں نے کہا کہ یہ اپنے انتقام میں اندھے ہو گئے تھے پاسپورٹ ہر پاکستانی کا حق ہے اس سے انکار نہیں کیا جا سکتا ہے، یاد رہے گزشتہ روز وزیراعظم شہباز شریف نے میاں نواز شریف اور اسحاق ڈار کے پاسپورٹ کی تجدید کے احکامات جاری کر دیے تھے۔ دوسری جانب وفاقی وزیر داخلہ رانا ثناء اللّٰہ

نے کہا ہے کہ ملک پر پچھلے پونے چار سال سے نااہل ٹولہ مسلط تھا، جس نے کرپشن، پروپیگنڈا اور انتقامی سیاست کے علاوہ کوئی کام نہیں کیا۔وزیر داخلہ رانا ثناء اللّٰہ نے استقبالیہ تقریب سے خطاب کرتے ہوئے کہا کہ تم اتنے متکبر ہو کہ تمہیں انسان کی عزت کا خیال نہیں، ایمانداری کا حال ہے کہ توشہ خانہ سے سارے گفٹ بیچ دیے، پوسٹنگ ٹرانسفر میں اتنی کرپشن کی کہ ملک تباہ ہوگیا۔انہوں نے کہا کہ ہم نے جمہوری طریقے سے اسے اتارا ہے، امریکا کو کیا ضرورت ہے اس کو اتارنے کی۔رانا ثناء اللّٰہ نے کہا کہ ہم اسے الیکشن کا کہتے تھے مگر یہ کہتا تھا کہ الیکشن وقت سے پہلے نہیں ہوں گے، اب اس نے شور مچایا ہوا ہے کہ فوری طور پر الیکشن کروائیں۔ اب ہم دیکھیں گے کب الیکشن کروانے ہیں۔انہوں نے کہا کہ گالی گلوچ گینگ تیار کیا ہے جو سارا دن گالی دیتا ہے، ہمارے کارکنوں کے خلاف بہت کارروائیاں کی گئیں، ہم انتقام نہیں حساب لیں گے۔رانا ثناء اللّٰہ نے کہا کہ جہانگیر ترین کے ساتھ جو اس نے کیا تاریخ گواہ ہے، ہم فرخ حبیب سے پہلے حساب لیں گے، پھر اسے پکڑیں گے، بزدار سے بھی مکمل حساب لیا جائے۔وزیر داخلہ رانا ثناء اللہ خاں نے کہاہے کہ ڈاکٹر عارف علوی صدر بنیں، عمران نیازی کے ذاتی غلام نہ بنیں۔ اپنے بیان میں رانا ثناء اللہ نے کہاکہ اگر صدر کے عہدے کا خیال نہیں ہے تو استعفیٰ دیں،ملک آئین کے مطابق چلنا ہے، عمران نیازی کے حکم پر نہیں۔ انہوں نے کہاکہ صدر مملکت کا عہدہ آئینی منصب ہے، سیاسی نہیں،آئین پر عمل کا وقت آتے ہی صدر، گورنر اور پوری پی ٹی آئی بیمار پڑ جاتی ہے۔انہوں نے کہاکہ سپریم کورٹ کے بعد لاہورہائیکورٹ کے حکم کی مسلسل توہین کی جارہی ہے،21 دن سے پنجاب کسی وزیراعلی اور کابینہ کے بغیر چلایاجا رہا ہے،یہ نہیں چاہتے کہ اہل لوگ آکر ملک کی سب سے بڑی آبادی والے صوبے میں خدمت کا عمل شروع کریں،صدر آئین پر عمل کرے، فوری نامزدگی کریں۔

Related Articles

جواب دیں

آپ کا ای میل ایڈریس شائع نہیں کیا جائے گا۔

Back to top button