رات کی تاریکی میں ’ ڈیل‘ کرنے والے دن کو سینٹ میں ’ ڈھیلے‘ پڑگئے :حافظ حسین احمد

جمعیت علماءاسلام پاکستان کے سینئر رہنما اور ممتاز پارلیمنٹرین حافظ حسین احمد نے کہا ہے کہ رات کی تاریکی میں ’ ڈیل‘ کرنے والے دن کو سینٹ میں ’ ڈھیلے‘ پڑگئے ، عمرانی کٹھ پتلی حکومت کے خلاف تحریک عدم اعتماد لانے کی دعویدار اپوزیشن سینٹ میں ایک بار پھر اپنی خود اعتمادی کھو بیٹھی ہے جبکہ طلحہ محمود ، مشاہد حسین اور یوسف رضا گیلانی نے ایک بار پھراپنی اصلیت دکھا دی۔

بلوچستان نیشنل پارٹی( بی این پی) مینگل کے مرکزی رہنما سابق ممبر قومی اسمبلی میرعبدالروف مینگل ، حاجی وزیر مینگل اور عبد الواحد بلوچ سے ملاقات کے بعد میڈیا سے گفتگو کرتے ہوئے حافظ حسین احمد نے کہا کہ اپوزیشن کے ارکان پارلیمنٹ کا ’اُن‘ کے جاری کردہ حکم کے تحت فرماں برداری نہ پہلی ہے اور نہ آخری ۔ انہوں نے کہا کہ طلحہ محمود نے سینٹ میں پہنچنے کے لیے جے یو آئی ف کی قیادت کو سونے سے تول کر وہ ان پرنچھاورکردی جبکہ جے یو آئی خیبر پختونخوا نے اپنے صوبائی امیر مولانا گل نصیب کو ٹکٹ دینے کا فیصلہ کیا تھا، بعد میں اپنے بھائی کو پختونخواکا صوبائی امیر بنانے کی جوسازش کی گئی وہ ایک الگ دلخراش واردات ہے۔
ایک سوال کے جواب میں انہوں نے کہا کہ جن پارٹیوں کے ارکان پارلیمنٹ اپنی ذاتی مفاداتی ڈیل کے تحت گھر سے نہیں نکلے اور پارلیمنٹ میں نہ آکر درپردہ حکومت کا ساتھ دیتے رہے توپھرعوام بھی مہنگائی اور حکومت سے تنگ آنے کے باوجود کسی نمائشی یا رینٹل مارچ اور احتجاج کیلئے کیوں نکلیں گے؟۔